ನಾವು ಅಧಿಕಾರವನ್ನು ನಂಬುವುದಿಲ್ಲ. ನಾವು ಜವಾಬ್ದಾರಿಗಳನ್ನು ನಂಬುತ್ತೇವೆ.
ಈ ಪಕ್ಷದ ಪ್ರತಿಯೊಂದು ಸ್ಥಾನವೂ — ಬೂತ್ ಸ್ವಯಂಸೇವಕರಿಂದ ಚುನಾಯಿತ ಪ್ರತಿನಿಧಿಯವರೆಗೆ — ವಹಿಸಿಕೊಂಡ ಜವಾಬ್ದಾರಿ, ಹಕ್ಕೆಂದು ಪಡೆದ ಅಧಿಕಾರವಲ್ಲ. ಹುದ್ದೆ ಎಂಬುದು ನೀವು ನಾಗರಿಕರಿಗೆ ಮರಳಿ ಸಲ್ಲಿಸಬೇಕಾದ ಋಣ, ನಿಮ್ಮ ಸ್ವತ್ತಲ್ಲ. ಅದು ಹಾಗಲ್ಲದಂತಾಗುವ ದಿನಕ್ಕಾಗಿಯೇ ಹಿಂಪಡೆಯುವಿಕೆ (recall) ಕಾರ್ಯವಿಧಾನವನ್ನು ವಿನ್ಯಾಸಗೊಳಿಸಲಾಗಿದೆ — ಅದನ್ನು ನಡೆಸುವುದೂ ಅದರ ವೆಚ್ಚ ಭರಿಸುವುದೂ ಪಕ್ಷವೇ, ರಾಜ್ಯವಲ್ಲ.
ಇದು ಮೊದಲು ಬರುವುದಕ್ಕೆ ಕಾರಣ.
ಈ ಪಕ್ಷದ ಉಳಿದೆಲ್ಲ ತತ್ವಗಳೂ — ಜಾತಿ-ನಿರಪೇಕ್ಷ ಕಾರ್ಯನಿರ್ವಹಣೆ, ಧಾರ್ಮಿಕ ತಟಸ್ಥತೆ, ರಾಜಕೀಯ ಪಕ್ಷಾಂತರಿಗಳಿಗೆ ಅವಕಾಶವಿಲ್ಲದಿರುವುದು, ನಾಯಕತ್ವ ಮಾನದಂಡ, ಕಡ್ಡಾಯ ನೀತಿ ಸಂಹಿತೆ — ಇದೊಂದರಿಂದಲೇ ಹುಟ್ಟಿಕೊಂಡಿವೆ. ಸದಸ್ಯರೊಬ್ಬರು ಅಥವಾ ಅಭ್ಯರ್ಥಿಯೊಬ್ಬರು ಹುದ್ದೆಯನ್ನು ತಮ್ಮ ಸ್ವತ್ತೆಂದು ಪರಿಗಣಿಸಿದರೆ, ಉಳಿದೆಲ್ಲ ನಿಯಮಗಳೂ ಬಿಚ್ಚಿಕೊಂಡು ಕುಸಿಯುತ್ತವೆ.
ಇದರ ಅತ್ಯಂತ ಸ್ಪಷ್ಟ ಆಂತರಿಕ ಪರಿಣಾಮವೇ ಪ್ರಮಾಣವಚನದ ಗಡಿ: ಪ್ರಮಾಣವಚನದ ದಿನದವರೆಗೆ ನಾವು ಅಭ್ಯರ್ಥಿಗಳನ್ನು ಪಕ್ಷದ ಸದಸ್ಯರಾಗಿ ಬೆಳೆಸುತ್ತೇವೆ. ಪ್ರಮಾಣವಚನ ಸ್ವೀಕರಿಸಿದ ಕ್ಷಣದಿಂದ ಅವರು ಸಾರ್ವಜನಿಕ ಹುದ್ದೆದಾರರಾಗುತ್ತಾರೆ, ಪಕ್ಷದ ಕಾರ್ಯಕರ್ತರಾಗಿ ಉಳಿಯುವುದಿಲ್ಲ. ನಿಷ್ಠೆ ಪಕ್ಷದಿಂದ ನಾಗರಿಕರ ಕಡೆಗೆ ತಿರುಗುತ್ತದೆ.
ಕಟ್ಟುನಿಟ್ಟಾಗಿ ಪ್ರತ್ಯೇಕವಾಗಿರಿಸಿದ ಮೂರು ಸ್ತರಗಳು.
ಈ ಸ್ತರಗಳನ್ನು ಬೆರೆಸಿದ್ದರಿಂದಲೇ ವೈರುಧ್ಯಗಳು ಹುಟ್ಟಿಕೊಂಡವು; ಅವೇ ಭಾರತದಲ್ಲಿ ಜಾತಿ-ನಿರಪೇಕ್ಷ ಅಥವಾ ಧಾರ್ಮಿಕವಾಗಿ ತಟಸ್ಥ ರಾಜಕಾರಣದ ಹಿಂದಿನ ಪ್ರತಿಯೊಂದು ಪ್ರಯತ್ನವನ್ನೂ ದುರ್ಬಲಗೊಳಿಸಿದವು. ನಾವು ಅವುಗಳನ್ನು ಬರಿಯ ಆಶಯದಿಂದಲ್ಲ, ಕಡ್ಡಾಯ ನಿಯಮದ ಮೂಲಕ ಪ್ರತ್ಯೇಕವಾಗಿರಿಸುತ್ತೇವೆ.
ಕಡ್ಡಾಯ ನಿಯಮದಿಂದ ಜಾತಿ-ನಿರಪೇಕ್ಷ
ಅರ್ಜಿ ನಮೂನೆಯಲ್ಲಿ ಜಾತಿ ನಮೂದಿಸುವ ಅಂಕಣವಿಲ್ಲ. ಜಾತಿ ಲೆಕ್ಕಾಚಾರದ ಟಿಕೆಟ್ ಹಂಚಿಕೆ ಇಲ್ಲ. ನಾಯಕತ್ವ ಆಯ್ಕೆಯಲ್ಲಿ ಜಾತಿಯ ಪರಿಗಣನೆ ಇಲ್ಲ. ಜಾತಿಯನ್ನು ಗುರಿಯಾಗಿಸಿದ ಪ್ರಚಾರ ಸಾಮಗ್ರಿ ಇಲ್ಲ. ಜಾತಿ ಆಧಾರಿತ ಬಣಗಳಿಲ್ಲ. ಉಲ್ಲಂಘನೆಗಳಿಗೆ ಸ್ವಯಂಸೇವಕ ನೀತಿ ಸಂಹಿತೆಯ ಮೂಲಕ ಉಚ್ಚಾಟನೆಯವರೆಗೂ ಕ್ರಮ ಜರುಗಿಸಬಹುದು.
ಸಾಂವಿಧಾನಿಕ ಮೀಸಲಾತಿಗೆ ಸಂಪೂರ್ಣ ಗೌರವ
ಪರಿಶಿಷ್ಟ ಜಾತಿ, ಪರಿಶಿಷ್ಟ ಪಂಗಡ, ಇತರ ಹಿಂದುಳಿದ ವರ್ಗ ಮತ್ತು ಆರ್ಥಿಕವಾಗಿ ದುರ್ಬಲ ವರ್ಗಗಳಿಗೆ ಭಾರತದ ಸಂವಿಧಾನದಲ್ಲಿ ಮತ್ತು ಕರ್ನಾಟಕ ರಾಜ್ಯ ಕಾನೂನಿನಲ್ಲಿ ಪ್ರತಿಷ್ಠಾಪಿತವಾಗಿರುವ ಮೀಸಲಾತಿಗೆ ಯಾವುದೇ ಧಕ್ಕೆಯಾಗುವುದಿಲ್ಲ. ಸಾಂವಿಧಾನಿಕ ಪ್ರಾಧಿಕಾರವಾಗಿ ಸರ್ಕಾರ ಐತಿಹಾಸಿಕ ಅನ್ಯಾಯವನ್ನು ಸರಿಪಡಿಸುವ ತನ್ನ ಕರ್ತವ್ಯವನ್ನು ನಿರ್ವಹಿಸುತ್ತದೆ; ಇದು ಸಾಂವಿಧಾನಿಕ ಕಾನೂನು, ಪಕ್ಷದ ಆಯ್ಕೆಯಲ್ಲ.
ಸಾರ್ವಜನಿಕ ಸಮಾಲೋಚನೆಯಿಂದ, ಎಂದಿಗೂ ಪಕ್ಷದ ಆದೇಶದಿಂದಲ್ಲ
ಮೀಸಲಾತಿ ನೀತಿಯಲ್ಲಿ ಮುಂದೆ ಆಗಬಹುದಾದ ಯಾವುದೇ ಬದಲಾವಣೆಯನ್ನು ವ್ಯವಸ್ಥಿತ ಸಾರ್ವಜನಿಕ ಸಮಾಲೋಚನೆಯ ಮೂಲಕ ನಿರ್ಧರಿಸಲಾಗುತ್ತದೆ: ಪ್ರಕಟಿಸಿದ ಪ್ರಶ್ನೆ ರೂಪಣೆ, ಪ್ರಕಟಿಸಿದ ಸಾಕ್ಷ್ಯಾಧಾರ, ಸಂಖ್ಯಾಶಾಸ್ತ್ರೀಯವಾಗಿ ಪ್ರಾತಿನಿಧಿಕ ನಾಗರಿಕ ಸಮಿತಿ, ಸ್ವತಂತ್ರ ಸಂಸ್ಥೆಯ ಮೇಲ್ವಿಚಾರಣೆಯಲ್ಲಿ ಪ್ರಕಟಿಸಿದ ವಿಧಾನದ ಪ್ರಕಾರ ನಡೆಯುವ ನಾಗರಿಕ ಮತಸಂಗ್ರಹ. ಪಕ್ಷಕ್ಕೆ ಒಂದು ನಿಲುವು ಇರಬಹುದು; ಆದರೆ ಅದನ್ನು ಹೇರುವ ಹಕ್ಕು ಪಕ್ಷಕ್ಕಿಲ್ಲ.
ಪಕ್ಷದ ಹಂತದಲ್ಲಿ ಯಾವುದೇ ಧಾರ್ಮಿಕ ಪರೀಕ್ಷೆಯಿಲ್ಲ. ಸರ್ಕಾರದ ಹಂತದಲ್ಲಿ ಸಾಂವಿಧಾನಿಕ ಧರ್ಮನಿರಪೇಕ್ಷತೆ.
ಧರ್ಮದ ಅಂಕಣವಿಲ್ಲ
ಅರ್ಜಿ ನಮೂನೆಯಲ್ಲಿ ಧರ್ಮ ನಮೂದಿಸುವ ಅಂಕಣವಿಲ್ಲ. ಧಾರ್ಮಿಕ ಸಂಬಂಧವನ್ನು ದಾಖಲಿಸುವುದೂ ಇಲ್ಲ, ಸಂಗ್ರಹಿಸಿಡುವುದೂ ಇಲ್ಲ. ಅಭ್ಯರ್ಥಿ ಆಯ್ಕೆ ಅಥವಾ ನಾಯಕತ್ವದಲ್ಲಿ ಧರ್ಮದ ಪರಿಗಣನೆ ಇಲ್ಲ. ಧಾರ್ಮಿಕ ಘಟಕಗಳಿಲ್ಲ, ಧಾರ್ಮಿಕ ಬಣಗಳಿಲ್ಲ, ಧರ್ಮ ಆಧಾರಿತ ಜನಸಂಪರ್ಕವಿಲ್ಲ. ಸಂವಹನದಲ್ಲಿ ಯಾವುದೇ ಧಾರ್ಮಿಕ ಚಿಹ್ನೆ ಅಥವಾ ಶುಭಾಶಯಗಳನ್ನು ಬಳಸುವುದಿಲ್ಲ; ಸದಸ್ಯರ ವೈಯಕ್ತಿಕ ಧಾರ್ಮಿಕ ಗುರುತು ಅವರ ಖಾಸಗಿ ವಿಷಯ, ಅದಕ್ಕೆ ಎಂದಿಗೂ ಪಕ್ಷದ ಮುದ್ರೆ ಇರುವುದಿಲ್ಲ.
ಸಾಂವಿಧಾನಿಕ ಧರ್ಮನಿರಪೇಕ್ಷತೆ
ಸಂವಿಧಾನದ 25-28ನೇ ವಿಧಿಗಳು ಧಾರ್ಮಿಕ ಸ್ವಾತಂತ್ರ್ಯವನ್ನು ಖಾತರಿಪಡಿಸುತ್ತವೆ; ಕರ್ನಾಟಕ ರಾಜ್ಯ ಕಾನೂನು ಇದನ್ನು ಸಂಪೂರ್ಣವಾಗಿ ಗೌರವಿಸುತ್ತದೆ. ಯಾವುದೇ ಧರ್ಮದ ಸಾರ್ವಜನಿಕ ಅಭಿವ್ಯಕ್ತಿಯನ್ನು ಸರ್ಕಾರ ಬೆಂಬಲಿಸುವುದೂ ಇಲ್ಲ, ವಿರೋಧಿಸುವುದೂ ಇಲ್ಲ. ಅಲ್ಪಸಂಖ್ಯಾತರ ಹಕ್ಕುಗಳನ್ನು ರಕ್ಷಿಸುವ, ಕೋಮು ಪ್ರಚೋದನೆಯ ವಿರುದ್ಧ ಅಸ್ತಿತ್ವದಲ್ಲಿರುವ ಕಾನೂನಿನ ಅಡಿಯಲ್ಲಿ ಅಭಿಯೋಜನೆ ನಡೆಸುವ ಮತ್ತು ಧರ್ಮ ಯಾವುದೇ ಆಗಿರಲಿ ಎಲ್ಲ ಸಾರ್ವಜನಿಕ ಸೇವೆಗಳಿಗೆ ಸಮಾನ ಪ್ರವೇಶವನ್ನು ಖಚಿತಪಡಿಸುವ ತನ್ನ ಸಾಂವಿಧಾನಿಕ ಕರ್ತವ್ಯವನ್ನು ಅದು ನಿರ್ವಹಿಸುತ್ತದೆ.
ಇತರ ಪಕ್ಷಗಳ ಹಾಲಿ ಅಥವಾ ಮಾಜಿ ರಾಜಕಾರಣಿಗಳನ್ನು ನಾವು ಆಮದು ಮಾಡಿಕೊಳ್ಳುವುದಿಲ್ಲ.
ತಮ್ಮ ಈಗಿನ ಪಕ್ಷ ಇನ್ನು ಅನುಕೂಲಕರವಲ್ಲ ಎಂದು ನಿರ್ಧರಿಸುವ ಮಾಜಿ ಶಾಸಕರು, ಸಂಸದರು, ಸಚಿವರು ಅಥವಾ ಪಕ್ಷದ ಪದಾಧಿಕಾರಿಗಳಿಂದ ನಾವು ಮಾನ್ಯತೆಯನ್ನು ಎರವಲು ಪಡೆಯುವುದಿಲ್ಲ. ಸದಸ್ಯರು ಮತ್ತು ಅಭ್ಯರ್ಥಿಗಳು ಜನ ಮಾದರಿ (The People's Model) ಒಳಗೇ ಬೆಳೆಯುತ್ತಾರೆ, ಪಾರ್ಶ್ವ ಪ್ರವೇಶದ ಮೂಲಕ ಅದರೊಳಗೆ ಬರುವುದಿಲ್ಲ. ವಿನಾಯಿತಿ ಪ್ರಕ್ರಿಯೆ — ಯಾವುದೇ ರಾಜಕೀಯ ಹೊರೆಯಿಲ್ಲದ, ಅಸಾಧಾರಣ ನಾಗರಿಕ ಗೌರವ ಹೊಂದಿದವರಿಗಾಗಿ — ಪ್ರಕಟಿತವಾದದ್ದು, ಸೀಮಿತವಾದದ್ದು ಮತ್ತು ವಿರಳವಾದದ್ದು.
ಇದು ಮೇಲರಿಮೆಯಲ್ಲ. ಬೇರೆ ಪ್ರೇರಣೆಗಳ ಅಡಿಯಲ್ಲಿ ರೂಪುಗೊಂಡ ರಾಜಕೀಯ ಅಭ್ಯಾಸಗಳು ಪಕ್ಷಕ್ಕೆ ಸೇರಿದ ಮಾತ್ರಕ್ಕೆ ಮರುಹೊಂದಿಕೆಯಾಗುವುದಿಲ್ಲ ಎಂಬ ಅರಿವು ಇದು. ನಾವು ಭಿನ್ನ ರಾಜಕಾರಣವನ್ನು ಕಟ್ಟಬಲ್ಲೆವು; ಹಳೆಯದಕ್ಕೆ ತೇಪೆ ಹಾಕಿ ಅದನ್ನು ಸಾಧಿಸಲಾರೆವು.
ಪಕ್ಷ ಕಾರ್ಯಸೂಚಿಯನ್ನು ರೂಪಿಸುತ್ತದೆ. ಸರ್ಕಾರ ರಾಜ್ಯವನ್ನು ನಡೆಸುತ್ತದೆ.
ಪಕ್ಷ ಮತ್ತು ಸರ್ಕಾರ ಎರಡು ಬೇರೆ ಬೇರೆ ಸಂಗತಿಗಳು; ಕಡ್ಡಾಯ ನಿಯಮದ ಮೂಲಕ ನಾವು ಅವುಗಳನ್ನು ಹಾಗೆಯೇ ಇರಿಸುತ್ತೇವೆ. ಪಕ್ಷ ಮನವೊಲಿಸುತ್ತದೆ; ಸರ್ಕಾರ ಜಾರಿಗೊಳಿಸುತ್ತದೆ. ಸಂವಿಧಾನ ಆಳುತ್ತದೆ; ಪ್ರಣಾಳಿಕೆ ಎಂಬುದು ಜನತೆಗೆ ಮುಂದಿಟ್ಟ ಪ್ರಸ್ತಾವನೆ, ಅಧಿಕಾರಿ ವರ್ಗಕ್ಕೆ ನೀಡಿದ ಆದೇಶವಲ್ಲ. ಪಕ್ಷಗಳು ರಾಜ್ಯದ ಯಂತ್ರಾಂಗವನ್ನು ವಶಪಡಿಸಿಕೊಂಡು ಅದನ್ನೇ ಆಡಳಿತ ಎಂದು ಕರೆಯಲು ಅವಕಾಶ ಮಾಡಿಕೊಡುವ ಆ ಬೆಸುಗೆಯನ್ನು ನಾವು ನಿರಾಕರಿಸುತ್ತೇವೆ.
ಸರ್ಕಾರಿ ಅಧಿಕಾರಿಗಳು ಆದೇಶ ಪಡೆಯುವುದು ಸಚಿವ ಸಂಪುಟದಿಂದ, ನಮ್ಮಿಂದಲ್ಲ.
ಯಾವುದೇ ಪಕ್ಷದ ಹುದ್ದೆಗೆ ಇಲಾಖೆಗಳು, ನಿಯೋಜನೆಗಳು, ವರ್ಗಾವಣೆಗಳು ಅಥವಾ ಸರ್ಕಾರಿ ಖರೀದಿಯ ಮೇಲೆ ಕಾರ್ಯಾಂಗ ಅಧಿಕಾರವಿಲ್ಲ. ಸರ್ಕಾರಿ ಹುದ್ದೆಯಲ್ಲಿರುವ ಪಕ್ಷದ ಸದಸ್ಯರು ತಮ್ಮ ಸಾಂವಿಧಾನಿಕ ಪಾತ್ರದಲ್ಲಿ ಸೇವೆ ಸಲ್ಲಿಸುತ್ತಾರೆ — ಪ್ರಮಾಣವಚನ ಮತ್ತು ನಿಯಮಕ್ಕೆ ಬದ್ಧರಾಗಿ, ಪಕ್ಷದ ಆಜ್ಞಾ ಸರಪಳಿಗೆ ಅಲ್ಲ.
ಪ್ರಮಾಣವಚನದ ದಿನವೇ ನಿಷ್ಠೆ ಬದಲಾಗುತ್ತದೆ.
ಅಭ್ಯರ್ಥಿಗಳು ಪ್ರಮಾಣವಚನ ಸ್ವೀಕರಿಸುವ ದಿನದವರೆಗೆ ನಾವು ಅವರನ್ನು ಪಕ್ಷದ ಸದಸ್ಯರಾಗಿ ಬೆಳೆಸುತ್ತೇವೆ. ಪ್ರಮಾಣವಚನ ಸ್ವೀಕರಿಸಿದ ಕ್ಷಣದಿಂದ ಅವರು ಎಲ್ಲ ನಾಗರಿಕರಿಗೆ — ತಮ್ಮ ವಿರುದ್ಧ ಮತ ಚಲಾಯಿಸಿದವರನ್ನೂ ಸೇರಿಸಿ — ಹೊಣೆಗಾರರಾದ ಸಾರ್ವಜನಿಕ ಹುದ್ದೆದಾರರು. ಪಕ್ಷ ಅವರಿಗೆ ಸಲಹೆ ನೀಡುವ ಮೂಲಗಳಲ್ಲಿ ಒಂದು ಮಾತ್ರ, ಇನ್ನು ಮುಂದೆ ಅವರ ಉದ್ಯೋಗದಾತನಲ್ಲ. ಪ್ರಕಟಿತ ಪ್ರಣಾಳಿಕೆಯ ಭರವಸೆಯನ್ನು ಬದಲಿಸಲು ಮಾತ್ರ ಪಕ್ಷದ ಒಪ್ಪಿಗೆ ಬೇಕು; ದೈನಂದಿನ ಆಡಳಿತ ನಿರ್ಧಾರಗಳಿಗೆ ಮತ್ತು ಸಂವಿಧಾನ ಹಾಗೂ ಕಾನೂನಿನಡಿಯ ಕರ್ತವ್ಯಗಳಿಗೆ ಅದು ಎಂದಿಗೂ ಬೇಕಿಲ್ಲ.
ರಾಜ್ಯಕ್ಕೆ ಪಕ್ಷದ ಬಣ್ಣವಿಲ್ಲ.
ಸರ್ಕಾರಿ ಕಾರ್ಯಕ್ರಮಗಳು, ಜಾಲತಾಣಗಳು, ಶಾಲೆಗಳು, ಆಸ್ಪತ್ರೆಗಳು ಮತ್ತು ಪ್ರಾಥಮಿಕ ಆರೋಗ್ಯ ಕೇಂದ್ರಗಳು (PHCs) ಗಣರಾಜ್ಯದ ಮತ್ತು ಕರ್ನಾಟಕದ ಚಿಹ್ನೆಗಳನ್ನು ಹೊತ್ತಿರುತ್ತವೆ, ಯಾವುದೇ ಪಕ್ಷದ ಚಿಹ್ನೆಯನ್ನು ಎಂದಿಗೂ ಅಲ್ಲ. ಸರ್ಕಾರ ಬದಲಾದಾಗ ಸಾರ್ವಜನಿಕ ಮೂಲಸೌಕರ್ಯಕ್ಕೆ ಮರುಬಣ್ಣ ಬಳಿಯುವ ಅಗತ್ಯವಿಲ್ಲ. ಮುಕ್ತ ಲೆಡ್ಜರ್ (Open Ledger) ಪ್ರಕಟಿಸುವುದು ರಾಜ್ಯ, ನಾವಲ್ಲ.
ಪ್ರಣಾಳಿಕೆಯ ಉಳಿದೆಲ್ಲ ಬದ್ಧತೆಗಳನ್ನು ಹೊತ್ತು ನಿಂತಿರುವ ಆಧಾರಗೋಡೆ ಈ ತತ್ವ. ಇದಿಲ್ಲದಿದ್ದರೆ, ಆಡಳಿತ ಪಕ್ಷವನ್ನು ಓಲೈಸುವಂತೆ ಮುಕ್ತ ಲೆಡ್ಜರ್ ಅನ್ನು ತಿದ್ದಲಾಗುತ್ತದೆ. JANATA ಆಪ್ ಪ್ರಚಾರದ ವಾಹಿನಿಯಾಗುತ್ತದೆ. ಸಾರ್ವತ್ರಿಕ ಆರೋಗ್ಯ ಸೇವೆ ಪಕ್ಷನಿಷ್ಠರ ಸಾಲಾಗಿ ಬದಲಾಗುತ್ತದೆ. ಇವೆಲ್ಲವನ್ನೂ ನಾವು ಮುಂಚಿತವಾಗಿಯೇ, ಲಿಖಿತವಾಗಿ ನಿರಾಕರಿಸುತ್ತೇವೆ.
ಪ್ರಣಾಳಿಕೆ ಹೇಗೆ ರೂಪುಗೊಳ್ಳುತ್ತಿದೆ.
ಪ್ರಣಾಳಿಕೆ ಇದುವರೆಗೆ ಒಬ್ಬ ವ್ಯಕ್ತಿಯ ಶ್ರಮ — ಹಲವು ವರ್ಷಗಳ ಕಾಲ ಬಿಡುವಿನ ವೇಳೆಯ ಕೆಲಸವಾಗಿ ಕೂಡಿಬಂದದ್ದು; ಅನುದಾನಿತ ಸಂಶೋಧನಾ ಯೋಜನೆಯಲ್ಲ, ಹಣ ಕೊಟ್ಟು ಮಾಡಿಸಿದ ಸಲಹಾ ಸೇವೆಯೂ ಅಲ್ಲ. ಪಕ್ಷದ ನೋಂದಣಿಗೆ ಮುನ್ನವೇ ಈಗ ಈ ಕೃತಿಯನ್ನು ಸಾರ್ವಜನಿಕ ಪರಿಶೀಲನೆಗೆ ಬಿಡುಗಡೆ ಮಾಡಲಾಗುತ್ತಿದೆ; ಏಕೆಂದರೆ ನಾಗರಿಕರ ಪರಿಶೀಲನೆಯೇ ಪ್ರಣಾಳಿಕೆಗೆ ಮಾನ್ಯತೆ ತಂದುಕೊಡುತ್ತದೆ.
ಸಾರ್ವಜನಿಕ ಪೂರ್ವಾವಲೋಕನ
ಸಂಪೂರ್ಣ ಪ್ರಣಾಳಿಕೆಯನ್ನು (ಇಂಗ್ಲಿಷ್‌ನಲ್ಲಿ) TPM Reader ಸ್ವರೂಪದಲ್ಲಿ ಮತ್ತು 601 ಪುಟಗಳ ಒಂದೇ PDF ಆಗಿ ಪ್ರಕಟಿಸಲಾಗಿದೆ. ಯಾರಾದರೂ ಓದಬಹುದು; ಕಂಡಿಕೆ-ಕಂಡಿಕೆಯಾಗಿ ಸಂಪಾದಕೀಯ ಟಿಪ್ಪಣಿ ನೀಡುವುದು ಅರ್ಜಿಯ ಮೂಲಕ ಮಾತ್ರ. ಪ್ರತಿಯೊಂದು ಟಿಪ್ಪಣಿಯನ್ನೂ ಓದಿ, ಅದರ ಮೇಲೆ ಕ್ರಮ ಕೈಗೊಳ್ಳಲಾಗುತ್ತದೆ.
ದ್ವಿಭಾಷೆ + ಸುಗಮ್ಯತೆ
ಕನ್ನಡ ಅನುವಾದದ ಜೊತೆಜೊತೆಗೇ ಇಂಗ್ಲಿಷ್ ಆವೃತ್ತಿ ಅಂತಿಮಗೊಳ್ಳುತ್ತದೆ. ಸುಗಮ್ಯತಾ ಸಾಧನಗಳು, ಸ್ಕ್ರೀನ್-ರೀಡರ್‌ಗೆ ಹೊಂದುವಂತೆ ಉತ್ತಮೀಕರಣ, ಕಡಿಮೆ ಅಕ್ಷರಜ್ಞಾನ ಇರುವವರಿಗೂ ಸುಲಭವಾಗುವ ಸಾರಾಂಶಗಳು. ಓದಲು ಬಯಸುವ ಪ್ರತಿಯೊಬ್ಬ ನಾಗರಿಕರಿಗೂ ಪ್ರಣಾಳಿಕೆ ಉಪಯುಕ್ತವಾಗಬೇಕು.
ಪಕ್ಷದ ನೋಂದಣಿ
ಭಾರತ ಚುನಾವಣಾ ಆಯೋಗದಲ್ಲಿ ಕಲಂ 29A ಅಡಿ ನೋಂದಣಿ. ದೇಣಿಗೆ ವ್ಯವಸ್ಥೆ ಪ್ರತ್ಯೇಕವಾಗಿ ಬಹಿರಂಗಪಡಿಸಲಾಗುವ ಪಕ್ಷದ ಖಾತೆಗೆ ವರ್ಗಾವಣೆಯಾಗುತ್ತದೆ. ಅಗತ್ಯವಿರುವ ತಳಹದಿಯನ್ನು ತಂಡ ಕಟ್ಟಿದ ನಂತರ ಮತ್ತು ಪ್ರಣಾಳಿಕೆ ಸಮರ್ಪಕ ಸಾರ್ವಜನಿಕ ಪರಿಶೀಲನೆಗೆ ಒಳಗಾದ ನಂತರವೇ ಚುನಾವಣಾ ಸ್ಪರ್ಧೆ ಆರಂಭವಾಗುತ್ತದೆ.